الخميس، يونيو 10، 2010

خالد سعيد ..حادث تعذيب جديد فى الاسكندريه






تحديث 2 : من مدونة محمد عبد الفتاح :

حد المتظاهرين امام قسم شرطة سيدي جابر يروي العنف الذي تعرضوا له علي يد قوة أمنية. 


كان عشرات النشطاء السياسين و اهالي منطقة كيلوبترا قد شاركوا في وقفة سلمية أمام قسم شرطة سيدي جابر احتجاجاً علي مقتل خالد سعيد الشاب السكندري علي يد مخبري كيلوبترا



تحديث: من نوت على الفيس بوك 

خالد محمد السعيد 
أسكندرانى
28 سنة
والده متوفى من و هو عنده 5 سنين
والدته ربة منزل كبيرة فى السن
عنده أخت كبيرة متجوزة و عايشة فى القاهرة 
أسمها زهراء
و أخ أكبر ب15 سنة أسمه أحمد و عايش فى أمريكا و معه الجنسية الامريكية
ساكن فى كليوباترا
مخلص ثانوية عامة 
و مدخلش جامعة
بس كان مهتم بالمزيكا و الاجهزة و الكمبيوتر

يوم الحادث الساعة 10 مساء كان واقف مع صحابه فى الشارع و كان واحد "مِعرفه" بيجري و بيجري وراه تلاته مُخبرين
بسبب حياذة و تعاطي مخدرات لهذا الشاب
استنجد بخالد فجري عليه راحو المخبرين جريوا وراهم هم الاتنين و مسكوا خالد و الولد التانى هرب
مسك المخبرين خالد أمام باب بيتهو كتفوه و اعدوا يضربه افتراضاً بأنه هو كمان معاه "بودرة" من غير تفتيش ولا حاجة
و خبطوا راسه فى السلم لحد ما مات
بعديها أخدوه فى البوكس ودوه القسم الظابط لاقه ميت
قاللهم أرموه قدام بيته و حطوله كيس بودرة فى فمه و قولوا أنتحر
و سرقوا 100 جنية كانت معاه و تليفونه المحمول
و الولد التانى "عُرف" انه مات من جرعة مخدرات مكثفة ليلة الحادث

كان الساعة 11 و اكتر من 150 شاهد أتصلوا بالاسعاف و راح المشرحة
رفض أخوه أخذ العزى غير لما يجبلوا حقه

أهل خالد و صحابه عملوا أعتصام .. دلوقتى 12 مساء الخميس 10\6 أمام قسم سيدى جابر
بوجود صحافة و مصورين

و أصدر مأمور القسم بتصريح من الداخليه أمر بضرب و أعتقال كل المعتصمين 
و ملمومين كلهم دلوقتى فى قسم سيدي جابر
و من ضمنهم صحافيه شابة و مصور شاب و محامي أتضربوا و كسروا الكاميرات و حبسينهم

أسماء المخبرين 
- عوض
- محمود الفلاح

و ضابط المباحث اللى كان فى البوكس
مباحث قسم سيدى جابر
-أحمد عثمان

أهل خالد مش ساكتين و مش هيسكتوا على حقه و هيوصلوا القصه لكل المسئولين و وسائل الأعلام

بقالى مده كبيره معملتش اى تدوينات ... جيت امبارح وكتبت واحده مفروض انها مسليه ودمها خفيف لكن للاسف مينفعش انزلها فى الجو المحبط اللى صحيت عليه النهارده الصبح
بصراحه انا شفت الصور امبارح بليل قبل الفجر بشوية ومكنتش مركز..افتكرتها صور للشباب المصرى اللى اتسحل واتصلب فى لبنان ..بس عن قرب ...ساذج انا
اقوم الصبح الاقى اسماء محفوظ فاتحه بوست اقتراحات على الوول بتاعها فى الفيس بوك عن مواجهة التعذيب اللى حصل لخالد محمد
مركزتش اوى
الاقى عبد الرحمن فارس عامل بوست على مدونته ...حاولت اتأكد من مصدر صحفى ملقتش ...بس وصلت ان اساس الخبر الدكتور ايمن نور
خلاصه الامر عشان مطولش عليكم ان الشاب خالد محمد كان قاعد فى نت كافيه دخل اتنين مخبرين "ياكلوا عيش " على قفا رواد المقهى ..للاسف خالد كانت روحه حرة شوية ..رفض طريقة التفتيش المهينه اللى اتعاملوا بيها معاه
طبعا دا ينرفز البشوات اللى خلاص اعتبروا الشعب دا شوية خنازير فى خرابه هما بيديروها ...وزى ما انتو عارفين ..كل ما تضرب الخنزير ياكل ويتخن اكتر .... البشوات طحنوا العلقه التمام قدام رواد النت كافيه واصحابه ...وخد عندك الكلمة الوسخه الجايه دى ...وسط ذهووووووول المتواجدين...ذهول ايه يا شعب حقه يتمسى ويتصبح بعلقه ..يعنى انا متأكد ان اللى كانوا فى السايبر كافيين اوى يدافعوا عن الفقيد ربنا يرحمه ويصبر اهله ....لييييييييييييه محدش هز طول ودافع عن الواد ... انا شايف انه نجاح للساسيه اللى بتنفذها الحكومة المصرية فى التعامل مع جيرانها ...واحنا مالنا ..هاتوا فلوس واحنا نحارب ..ما احنا ياما عملنا وخدنا ايه ...النتيجه ان الشعب نفسه بقى بيتعامل مع بعضه بنفس الطريقه ..وادى النتيجه ..جهاز امنى متوحش نسى اصلا ايه وظيفته الاساسيه ..وشعب خانع خاضع ذليل متواطء موطوء مخنوق قدام القوة دى .
الحفله لسه مخلصتش رايح فين؟؟ لسه لسه دا الكلام هيحلو....
بعدين اخدوا خالد لعماره جمب السايبر وكملوا الضرب وتقريبا حسوا انه لسه فيه الرمق وبالتالى شدوه على البوكس وووده قسم الشرطه ...عملوا الواجب والحمد لله وصلوه لبيته الحقيقى صح
واستريح من الدنيا وقرفها
وجابوه رموه فى الشارع مكان ما خدوه ..بس خلاص
النت كافيه : فى شارع  بوباست 
منطقة الحادث: كليوباترا
المجرمين تبع قسم شرطة : سيدى جابر
المخبرين هما : محمود الفلاح والاخر شهير ب عوض المخبر
اهل الفقيد : حرروا محضر رقم 1545 بتاريخ الاثنين سبعه يونيو 2010
التفاصيل بقى للى عايز يتأكد هتلاقيها

‏هناك 11 تعليقًا:

  1. اقول لسه ياما هنشوف من حكومه مصر بلد الامن والامان عرفتو ليه احنا بنتهان فى خارج مصر بيقولك انت فى بلدك طلع دين .... من حكومتك المفروض انها تحميك يبقى انا ليه هبقى عليك يا مصرى يا زباله يا حثاله مستنى مننا ايه لما انت فى بلدك مش واخد حقك لما انت فى بلدك الكلب احسن منك اقول ايه ولا ايه ولا ايه معنديش غير حسبى الله ونعم الوكيل

    ردحذف
  2. احا لينا احنا

    ردحذف
  3. مش هقول اكتر من حسبى الله ونعمه الوكيل

    ردحذف
  4. حسبنا الله ونعم الوكيل ولاكن علينا باصلاح انفسناحتى يصلح حال من ولى علينا قال تعالى(ظهر الفساد فى البر والبحر بما كسبت ايدى الناس )

    ردحذف
  5. الحكومة المصرية دة حكومة وسخة والله

    ردحذف
  6. حسبى الله ونعم الوكيل انا بكره مصر مصر دة احنا بقينا والله يهود

    ردحذف
  7. دى اخرة كل شريف فى البلد ربنا يرحمك يا خالد

    ردحذف
  8. منكم لله
    على شباب اللى بيضيع

    ردحذف
  9. حسبى الله ونعم الوكيل فيهم دول مش بشر دول حيوانات

    ردحذف
  10. للاسف انا غير متابعه للاحداث لكن ما شاهدته اليوم مؤلم جدا ومنتهى الوحشيه لكن الحق مش عليهم الحق على اللى سمحلهم بالبلطجه وانا اسفه انى بقول الكلمه ده لكنها فعلا شغل بلطجة لكن ارجع واقول احنا لازم نقف واقفة رجل واحد ونستعد لان اللى جاى فعلا هايكون اسواء

    ردحذف
  11. مبارك مش مزبوووط وحرام الي عملووو بهالشب

    ردحذف