السبت، نوفمبر 14، 2009

الثلاثاء، أكتوبر 27، 2009

الجمعة، أكتوبر 23، 2009

يا جـــــمـــــال .... ايـــــش عــــرفـــــك انــــــــت؟



تضامنا منى مع الحمله المصريه لمناهضة التوريث





تضامنا مني مع حملة نوارة نجم

ايش عرفك انت

اكتب هذا البوست







ايش عرفك انت بواحد مؤهل عالى بيشتغل شغلتين فى قطاع خاص

ومجموع مرتبه من الوظيفتين لا يتعدى ال 900 جنيه شهريا




ايش عرفك انت بمحمد مدرس العلوم

اللى بياخد 350جنيه شهريا

ومتجوز وعنده عيلين

وكل طموحاته انه يقدر يقي عياله من شر الجوع




ايش عرفك انت بفاطمة خريجة الاعلام

اللى اشتغلت فى صيدلية

بتكنسها وتمسحها وترتب علب الادوية

علشان تاخد 100 جنيه اول كل شهر




ايش عرفك انت بمنى خريجة التجارة

اللى بتشتغل فى محل جزم

وبتضطر انها تطنش تحسيس مديرها على صدرها فى الرايحة والجاية

علشان خاطر 300 جنيه شهريا بتساعد بيهم امها الارملة وباقى اخواتها الاربعة




ايش عرفك انت بمروة اللى على وش جواز

و راحت تصرف شيك من وزارة الشؤن الاجتماعية

تضامنا من الدولة فى تيسير مصاريف الزواج

عارف الشيك بكام؟

بخمسين جنيه

اشترت بيهم طشت وكنكة

اه صحيح وانت تعرف منين

تلاقيك متعرفش يعنى ايه طشت




ايش عرفك انت بأم محمد الكفيفة والكسيحة

اللى ابنها محمد عائلها الوحيد

مات فى حادثة

واللى قتله ابن واحد من كبارات البلد عنده نفوذ

ومارضيش حتى يدفع دية لام محمد

وقالها بالحرف الواحد

مالكيش عندى دية

واخبطى راسك فى الحيط






ايش عرفك انت بيا

تعرفنى منين انت ولا ابوك

علشان تبعتولنا تلغرافات تعزية في والدي



حسيت بيا يوم



جيت معايا يوم وانا فرحانة بنفسى وفخورة

بمؤهلى العالي

اعلام قسم صحافة

ورايحة اقدم على وظيفة فى مكتب محامى

الاقيه بيقولي

هتكتبى المذكرات على الكمبيوتر

وهتكنسى وهتمسحى المكتب وهتقدمى شاى للعملا

وهتاخدى 150 جنيه شهريا



مسحت دموعى يوميها؟

حسيت معايا بالاهانة يوميها؟

لعنت اليوم اللى اتعلمت فيه يوميها؟




ايش عرفك انت بيا

جيت معايا لمكتب توظيف

وشوفت صاحب المكتب الوسخ ابن الوسخة

وهو بيغتصبنى بعيونه

وبيعرينى بنظراته من راسى لرجلى

ويقولى انا مستخسرك فى بهدلة الوظايف اللى عندى

انتى هتبقى ليا انا؟

ولو عايزة من الف جنيه لخمستلاف انا مستعد ادفعهم؟

تفيت معايا على وشه يوميها؟

بطنك وجعتك يوميها من حقارة العرض؟

نفسك راح منك من الخضة وانت بيتعرض عليك عرض وسخ كدة؟

مشيت فى الشارع يوميها وانت عيونك مزغللة من دموعك؟




ايش عرفك انت بيا

اشتغلت فى يوم بيبي سيتر لبت عندها ست سنين

من ورا اهلك

علشان متجرحش مشاعرهم

و علشان متهينش مستواهم الاجتماعى

وعلشان مايستنكروش فعلتك

وانك ازاى تشتغل كدة وانت مؤهلك اعلام قسم صحافة؟

وان عيلتك مراكزها حساسة؟



سمعت بودنك اهانة ام البت

وهى بتقولك من طراطيف مناخيرها

ازاى بتقولى لبنتي تجيب القلم من على الارض

امال انا جايباكى هنا ليه

ده انا مابطلبش منك انك تشطفيها بعد ما تعمل تواليت

دى البنت بتندهلى انا و بتقولى يا مامى تعالى شطفينى لانها مابتعرفش تشطف نفسها



ايش عرفك بيا وقتها

حسيت بيا وقتها

قلت فى سرك معايا وقتها وانت بتلم حاجاتك و بتمشى من عندهم وبترزع الباب وراك

احا يا بنت الكلب انتى كمان عايزانى اشطف طيز المحروسة بنتك بعد ما تشخ خرا

صعبت عليك نفسك يوميها

عيطت يوميها

روحت بيتك و كنت عايز تحرق ام الشهادة اللى خدتها

ومش عارف تعمل بيها ايه غير انك تلفها وتلبسها فى طيزك زى الخازوق

بصيت فى عيون اهلك ولومتهم لوم صامت

انهم استجابوا لرغبتك ودفعوا دم قلبهم فى تعليم خاص

علشان تتعلم الحاجة اللى بتحبها

واخرتك بيبى سيتر عند عيلة

امها عايزاك تشطف طيظ المحروسة






ايش عرفك انت بيا

اتطردت فى يوم من مكتب

مدير مكتب مدير جامعة

علشان مارضيتش انك تتمرقع معاه فى الكلام

علشان يوافق انه يدخلك تعمل انترفيو مع مدير الجامعة






ايش عرفك انت بيا

كنت معايا فى المعادى

لما بنت وقفتنى وطلبت منى انى امشى

معاها شوية لحد محل الكوافير اللى بتشتغل فيه

علشان ادارى جيبتها المقطوعة

وفى وسط دردشتنا

شهقت بالصوت الحياني فى الشارع

وقالتلى يا نهار ابيض

لما عرفت انى جاية من اكتوبر لحد المعادى

علشان ادور على شغل وانا معايا بكالوريوس اعلام قسم صحافة؟

وهي ساقطة ثانوية عامة وبتشتغل وبتاخد مرتب كويس

كنت معايا يوميها وهى بتعرض عليا انى اشتغل معاها

في نتف الحواجب وعمل الوش بالفتلة

واخد الف جنيه فى الشهر غير البقشيش؟






ايش عرفك انت بيا

ايش عرفك انت بذل بنت الأكرمين علشان تعتمد على نفسها

دون اللجوء لواسطة عيلتها ام مراكز حساسة



ايش عرفك انت بيا

لما الاقى نفسى محطوطة بين خيارين

ياما اشتغل شرموطة او خدامة علشان اخد مرتب كويس

او اشتغل شغلانة محترمة واخد مرتب لا يقينى ذل السؤال ولا يقينى شر الحاجة




هى البلد دى مافيهاش وظائف محترمة بمرتب محترم؟

مافيهاش وظيفة لا تهين شرفى ولا كبريائى ولا مستوايا الاجتماعى ولا تعليمى؟




ليه الوظائف المحترمة مرتباتها تكسف

وليه الوظائف الوسخة والمهينة مرتباتها عالية

وليه علشان اشتغل شغلانة محترمة بمرتب محترم اضطر انى الجأ لواسطة؟

طب والناس اللى معندهومش واسطة يعملوا ايه؟



ايش عرفك انت بيا دلوقتى

يتعيط معايا معايا دلوقتى

مناخيرك ساحت منك دلوقتى

حاسس بقهرتى دلوقتي

صوتى وصلك دلوقتى

سامعنى يا جمال

طب ابوك سامعنى؟






ايش عرفك انت بواحدة بنت ناس و متعلمة ومتربية

تتحول لمجرد بت خيخة

عارف يعنى ايه خيخة

تلاقيك مش عارف






بص يا اسمك ايه

الوحيد اللى كان ممكن اخاف عليه من كلمة طظ هاقولهالك هو ابويا

وابويا مات

فبالتالى دلوقتى بس اقدر اقولهالك بعلو صوتى

يا جمال طظ فيك

وطظ فى ابوك

وطظ فى امك

وطظ فى عيلتي ام مراكز حساسة

اللى خايفين على مراكزهم الحساسة من كلمة طظ هاقولهالك






اخر الكلام


يا جمال

لو عايز تحكمنا ... اعرفنا








اخيخ كلام


يا جمال عنداً فيك وفي ابوك

انا لسة قادرة اضحك من قلبي

وايش عرفك انت بالضحك من القلب؟








انتهى


بت خيخة وأي كلام

الجمعة، سبتمبر 11، 2009

بورسعيد...... كارسعيد

                      صوره بكاميرا موبايلى التعبانه لاحد المناظر فى بور  
كنت فى بور اليومين اللى فاتوا .... انا اعتيادى هناك كل تلات اربع شهور بحكم انها بلد اخوالى ...... بس فيه شىء لاحظته منفر اوى المره دى .....غير الزباله اللى فى كل حتة ومستوى الفقر الى عمر بورسعيد ما عاشته قبل كده ولا البنات اللى اففففففف واففف دى زى ما انتا تحسبها تنفع مدح "من النوع قليل الادب بس" وذم ........ غير كل ده لقيت حاجه عاشره........ اييييييييييه العربيات دى كلها اييييييييييه الهبل ده ..... مدينه تتاخد كعابى"موتورجل" وفى قراءات اخرى "سيرا على الاقدام" فى نص ساعه ساعه بالكتير اوى لو انتا ماشى معاك مراتك الحامل ..... الاقيها "تعج" بالسيارات من كل نوع وشكل وغباوة....... ولمن لا يعرف فالسيارات فى بور ارخص منها فى اى حته تانيه بالجمهورية "منطقة حرة" خصوصا الهوندا واخصا الهوندا سيفيك...... المهم ان العربية اللى باربعين وخمسين الف فى بر مصر بعشرين وسبعتاشر فى بر بور ....... الى جانب عدد مهووول من التاكسيات وبرضه احدث موديل وكل ده فى مساحه لا تزيد عن تلات كيلو متر فى اتنين ونص " المدينه بتاخد شكل شبه متوازى من منظور عين الطائر" ...... اه ونسيت اقول انها برضه بور فيها بدال الخط اتنين وتلاته من السرفيسات وبرضه منها النضيف اوى والمتوسط ومفيش رابع ورا "ودى ميزه لا توجد فى اغلب محافظات مصر" ..... يبقى السؤال بقا ليييييييييييييييييييه العدد ده كله من السيارات الخاصه فى بلد مفترض انه ميسور الحال تاكساويا وسيرفيسيا ...... دا المنصوره اللى هيا المنصوره -حيث تراخيص التاكسيات متوقفه من كام سنه- لازلت هناك اماكن كثير فيها صالحه للسير وللركن يعنى فيه متسع للمزيد من السيارات" تقريبا نفس مساحه وشكل بور" فى حين بور كل الشوارع مركونة السيارات مخنوقة المسارات خصوصا شارع التلاتينى وما حوله "حاجه زى نص البلد كده" .
خلاصة الامر انى هضطر اغنى نفس الاسطوانه المشروخه بتاعت اننا شعب استهلاكى وغير منظم وعنده الكماليات فى سلم اولوياته قبل الضروريات وان بره بيستخدموا العجل فى كثير مفن مدن اوروبا مع القدره على شراء السيارات وووو الى اخره...... بس الاكتر من كده اننافى بلد بنيته التحتيه هشه او شبه مشلوله ومع ذلك المستوى ده من الاسراف بيخنقنا اكتر واكتر...... يبقى بالعقل كده نستاهل حكومتنا ونظامنا ده ولا لا؟؟؟؟ هو حد سمع عن بلهارسيا بتيجى لحد ادى دهره للترعه قبل كده؟؟؟ ياشعب بورسعيد ممكن لو سمحتوا تدوا دهركوا للترعه؟

الجمعة، أغسطس 07، 2009

ظلاميــــــــــــــــــات نورانـيـــــــــــــــــة



ما الذى يحدث ياشباب مصر ....... لا اكاد ارى احدكم مستبشرا .... سواء كان هذا فى الفضاء الافتراضى هنا او حولى فى الحياه .... ما بين هارب وضارب  ........ فلا الهروب اراح ولا التوهان فى دروب الضرب ازاح......... القنوط فى وجوهنا يصرخ انا انقذونى من نفوس ترى النور ما هو الا شرارت كهرباء لسلك عريان فى يد ضابط سفاح......... نفوس ترى الظلام طامس ... غامس... ظلام قطيفه لا لمعه فيه حتى لو شقه نور اى صباح.......... ااقول اف لى ولكم ام اقول اف لهم ام اقول افا للعالمين اجمعين......... ما بين كافر بارضه الى نازع لعرضه الى منتشٍ بالحاد اخذ بلب عقله   .......... ما الذى يحدث حقا.......... تائه فى الرد .
ها انا فى اخر سنين دراستى الجامعيه ولن اقول الديباجات المعروفه كمثل انى لا اعرف ما القادم ام لا اجد مخرجا  الخ........ بل اقول انى والحمد لله ..... كعمل موجود .... كارتباط سهل جدا....... كاسره مستقره......... لكنى لا اطيق انفاسى على ارضى........... لا اجد عشق ترابها يسرى من جديد..... حقا اكرهها .......... لا كره تدمير ولكن كره من عاف الشىء............. اعافك يا بلدى....... اعافك يا لقيطه عصرى.............. اعافك يا من بصكوك الغفران كفرتى ويامن فى دروب البغاء تعفرتى........ افيدونى اكرهكموها الله .......... الا من نور؟

الأربعاء، يوليو 29، 2009

اســتــدعـــاء بــطـــعـــم خـــفـــة الظل


النهارده راجع من الزفت التدريب اللى مالوش لازمه ..... فى عز الحر...... الاقى الحاجه قاعده محسوره يا عينى وبتقولى جايلك استدعاء من امن الدولة..... تروحلهم بكره فى مكتبهم الساعه تسعه الصبح......... والله؟!....... طب حد يحضر الغدا عشان جعان....... طيب هتعمل ايه يابنى....... روووووووووووقى ........ انا ايه اللى هيقومنى تسعه من النوم....... هنهرج.؟!.....ثم ان انا معرفش فين مكتبهم ده...........
المهم انا مش مضايق الا لسبب واحد ........ ليه دلوقت....... يعنى لسه فاكرين ولا العالم دى مش شايفه شغلها كويس...... ولا هوه الورق اللى كان مكتوب فيه اسمى تبع الاخوان اتاخر فى الوصول ليهم اربع سنين؟؟؟؟؟........ بجد استفزاز....... يعنى مفروض الناس دى تتشد على الاستهتار ده........ امن البلد مش لعبه......... انا بصراحه مليش مزاج افوت حاجه لذيذه زى دى خصوصا انه اتحكالى عنها ....... وبيقلك الظباط هناك دمهم خفيف وبيعموا احلى نمر تنفع فى اى فيلم درجه تالته....... بس مفيش مشلكة نسال حد من الاخوه القدام ....... اروح ولا؟...... فوتوكوا بعافيه

الاثنين، يونيو 15، 2009

الدنـــــيــــــا بقت مقرفه اوى!!


هتبقى غريبه انى اتغيب تلات شهور واول ما اكتب يبقى شغل اكتئاب كده .... بس فعلا الدنيا بقت مقرفه اوى ....... اوى
وعلى كل المستويات..... قرفان اقعد اعدد حتى ..... من منظرنا قدام نفسنا للى ركبولنا دقن عيره يمكن نحبهم فى شخص اوياما للى فاكرينهم ....... بقولكم ايه... فعلا والله قرفان لدرجة انى مش عايز اتكلم ........ الدنيا مقرفه......... وبس

الأربعاء، فبراير 11، 2009

مــنــمــنـــمــات فـــكــريــة ... حـلـقـــــة أولــى

تشابه فى اللفظ لا أكثر-منمنمة فارسية- "الصورة نقلا عن توبك فى الديفيدى العربى"
------ < حجات مكعبرة ... ساعات مدورة ... المهم ان شكلها مش هيركب على موضوع محدد واضح المعالم ممكن اتكلم فيه.....تلح عليا من وقت الى اخر ... عايزة تطلع ساعات .... ممكن اوئد البعض منها ونظرة سخرية على وجهى فى اوقات كثيرة ... لكن فى الاخر بعضها بيقدر يهرب على ورق ،مطالب بحقة اللى بيعتبره شرعى فى انه يشوف الدنيا ... او الدنيا تشوفه .... مش هتفرق كتير ... تحت كثير من الالحاح اديتهم كلمة شرف " خلاص يا حلوين بعد كده هتنكتبوا تحت اسم منمنمات.... مش باينين ؟!.... صغيرين ....! ميضرش .... مش يمكن غيرى يتبناكوا ... يكبركم ...يحوركم ...المهم ان الوئد مش مستقبلكم .... مش كده ولا ايييييه؟" .....حلقات هيتنشروا فيها من غير ترتيب ولا سابق معاد ... اتنين .. خمسه... نص فكرة حتى.... نبتدى..

1- بعض العيون تخرج مغرورقة بالدموع بعد الصلاة إما خشوعا ... أو لكثرة التثاؤب ... والثانى هو الغالب.

2- ليه ساعات بنعتبر بعض افكارنا او ارائنا غير جديرة بالنسب لينا لمجرد انها فى تخصص " منفهمش فيه قد كده" فبالتالى قبل حتى ما تقولها تبص للى قدامك وتقوله بلهجة تحذيرية " دا رايى اى نعم بس انا مفهمش فى النقد الفنى "... ياسيدى طفل مبتسر احسن من منفى الابوه....مش كده ولا ايه؟

3- انا جعااااااااان .... - طب وانتو مالكم ؟!- بصراحة عارف والله .... بس اقاعد اقول منمنمااااااااات منمنمااااااااااات وفى الاخر يبقوا اتنين بس ....صيغة الجمع تزعل .... يبقوا تلاته عشان المصداقية .....انا ..... جعااااااااااان.

الاثنين، فبراير 09، 2009

فـصـل دراسـى...ولا حــلــة بـريــسـتـو؟!


منذ أسبوع أو يزيد انتهى فصل دراسى اتسم بالقسوة الناعمه ، قد اكذب على نفسى لو قلت انه ملىء بالاحداث الجسام او المجهودات العظام ...على العكس من ذلك ، لم ابذل من الجهد العقلى او النفسى او حتى الجسمانى الكثير ، ومن هنا اتت قسوته...
*** فعلى صعيد دراسى مرير اعيش فصوله منذ الانتقال البغيض لجامعة المنصوره -حيث ان تنسيقى قذفنى اول الامر الى الاسماعيلية- اعيش بين تناقض حبى لما ادرس وكرهى لاستذكاره .... عَله ضيق الوقت؟ ..ربما طريقة العرض؟ ..او حتى المزاج الشخصى؟ ...حقا لا أدرى!
***ومن جانب اخر فلو تكلمت عن الجهد الجسمانى لوجدته اقل بكثير من نظيره فى اوقات سابقة، الى جانب تطورات اخرى لا تهم سواى وقد اعرضها من باب الطرافه لا اكثر " كالكرش الصغنن الذى بدأ يعلن عن وجوده على استحياء".
***ام عَله نفسيا الذى اتت منه اكثر جوانب القسوه قتامة؟! ..حدث ولا حرج عن علاقات تتطور للأحسن بكثير ، واخرى اصابها سرطان ملعون اقل ما يقال عنه ان قسوة الleukemia"احد انواع سرطان الدم" تبدو كحيوان اليف مشاكس لا اكثر بالنسبة له.
***تم بحمد الله ترم بغيض قد يحاول مد تأثيره واثآره لبقية العام او حتى لاعوام تاليه ولكنى احسَبُه لن ينجح واحسَبُنى لن اساعده....

الثلاثاء، يناير 13، 2009

انفلونزا الطيور والحرب على غزة .. ما العلاقة؟!


علاقة غريبة وغير واضحة المعالم بدأت تتكشف بين انفلونزا الطيور والحرب على غزة ،والرابط بينهما مصر ..... فحينما اصابت انفلونزا الطيور الثروة الداجنة فى مصر- على استحياء- قامت الحكومة يومها ممثلة فى وزارة الزراعة والجيش الى جانب التوجيهات العليا التى لا تخلو منها اى قضية كبيرة فى مصر " مع احتفاظه بالحكمة الابدية " ،قامت بالقضاء على ما يقرب من 50% من تلك الثروة او اكثر ، يعنى عملت اللى يستحيل كان يقدر عليه ذلك الفيرس اللعين ...... مصر الان ياسادة تتعامل مع غزة بنفس المنطق بل واكثر اهانة .
* التسويات التى تقدمها مصر لغزة هيا عبارة عن اعتراف خطى بانهم دواجن ، سنتوقف عن قتلكم ما دمتم سكتم عن الصياح ومحاولة تكسير هيكل " العشة " التى تحيط بكم ، بل واكثر من ذلك ، سنوفر لكم الطعام والشراب والدواء والكهرباء ، وكل هذا مجانا، ماذا؟؟! ترفضونة مجانا ....تريدون ان تشتروه باموالكم .... لالالالا نحن كما قلنا نعاملكم كدواجن ، اترونا ناخد من دواجننا حق ما نطعمهم .... بل وسنتركم من دون ذبح لمدة عشر سنوات ..... تصورا عشر سنوات دون ان تمتد يد لداخل " العشه"...... عفوا .... نقصد القطاع .... لتتحسس اجسادكم محاولة اخذ الاسمن والاكثر اشباعا ..... تصورا !! ..... ولكن انتظروا ، كما قلنا لكم ، لااااااا صـــــيـــــاح ..... الانفلونزا تأتى على الصوت وساعتها لا تلوموا الا انفسكم ، فقد حذرناكم ، ماذا ؟!....... لقاحات ضد الفيرس؟ ....... طبعا طبعا ....... ها هى ومدون عليها ايضا ضمان رسمى بان الفيرس لن يهاجم طوال مدة العشر سنين ........ "على فكرة اللقاحات اللى دخلت مصر ايام الانفلونزا على يد كبار حيتان رجال الاعمال حبايب صاحب الحكمة الابدية كانت صينى ومضروبة ولكن كالعادة تم 'الطرمخة' على اللى حصل" . عايز اقول ايه من الاخر يعنى؟؟..... لا ولا حاجه .... ما احنا اتفقنا من الاول ..... دى مجرد طراطيش كلام ........مش اكتر.

الجمعة، يناير 09، 2009

العقول الصهيونية تتفق فى كل شىء حتى الغباء!

هذا مقطع وجدته على اليوتيوب من تغطية لقناة الجزيرة فى اليوم الثالث عشر للمجزرة على غزه حيث كان يغطى تداعيات اطلاق صورايخ من لبنان على شمال فلسطين المحتلة على مغتصبة يهودية...... فلندع الصوره تتكلم


الثلاثاء، يناير 06، 2009

Some Caricators about GAZA

source:Al-Quds al-‘Arabi


source: the gaurdian



source :peoplesgeography.com


source: the gaurdian




source : unknown to me.



source : some turkish art.




الاثنين، يناير 05، 2009

ليفنى والجعجعة المعتادة:نحارب الارهاب!!

للاسف من ضغط الامتحانات مش قادر اعلق على الاحداث بالشكل الامثل ، حتى هذا المقطع لا اجد من الدماغ فى الاخص ما يكفى للتعليق عليه.
ساتركه لتقدريكم انتم........


آن لمصر ان تستريح!!

الآن نستطيع ان نقول للقيادة المصرى ...... احسنت ..لقد وصلت للهدف المرجو من كل تصرفاتك الغبيه على المستوى الدولى فى الفترة السابقة ، فها نحن نسب علننا فى مظاهرات التنديد فيما تفعل اسرائيل " وليس هذا ذنب من يسب بكل تأكيد" ، وها نحن نخرج من مكانة الوسيط الاكثر فعالية فى القضيه الفلسطينه التى ظللنا لفترة طويلة نعتبرها قضية امن قومى مصرى الى جانب انهم اخواننا " اه والله اخواننا واللى مش مصدق يخبط دماغه فى الحيط" ، آن للغوغاء "القلة كما هى العاده" التى تقول بكل صفاقة وتبجح" هنفضل نحارب للعرب لحد امتى ياعم...... ايكش يولَعوا...!!!"


*** آن لكل هذا ان يُأتى ثمار نجاحه...... فتركيا دخلت على الخط كممثل لمطالب حركة حماس وكشريك اساسى فى اى جهود تسوية قد يتم القيام بها فى الفترة القادمه.



*** آن لكل هذا ان يُأتى ثمار نجاحه...... فقطر اصبحت من قواد المنطقه اصحاب الصف الاول .... تدعو لانعقاد القمم ... وتقول من الكلام على لسان اميرها ما عقمت السنه غلماننا من القاده عن نطقه .......



*** تستطيع ان تحتفل يامبارك .....فلن يزعجك احد بعد الان بكلام من نوعية " مصر الاخت الكبيره" او " نتطلع الى دور مصرى محورى فى هذه القضيه او تلك" ....... تريد السلام... حسنا ها هوه سلام الارانب الذى نعيش فيه....... ألا سحقا لك ولسلامك المخنث .... ألا سحقا.

لافتة جديدة للشاعر أحمد مطر!!

**بعيدا قليلا عن ازيز المعركة الدائره فى غزة .... هذه التدوينة ....
الشاعر العراقى أحمد مطر فى قصيدة جديدة لكل العرب :-
"اضغط على الصورة لتكبيرها"


اتمنى ان تفيقكم .....



السبت، يناير 03، 2009

وتــــســــتـــمـــر الــــمـــــذبــــــحــــة!!

هذه تدوينه حيث لا مجال للكلام سأترك الصوره تتكلم:-

























وهذا فيديو لبداية تحرك القوات الهمجية فى اول ليلة الرابع من يناير:-



الجمعة، يناير 02، 2009

مبارك : دى ارض اسرائيل ويجب ان ترى ما يدخل وما يخرج منها!!!!؟

والله بلغ السيل الزبى ..... والله لا اجد ما يعبر عما يموج فى نفسى ويحرق جنبات عقلى الا سبابا ما يزيدنى الا اثما وما ينقص من قدره شيئا.... لا لعلو مكانته "حاشاه" ولكن لضعف حجته وكثرة زلات لسانه وهوانه على الناس حتى اصبح الرد على كلامه من قبيل الجرى وراء طفل مشاكس قذفك بحجر فى الطريق ، المشكله انه ليس بطفل ولكنه رئيس دولة...... عذرا ان كان كلامى مبهما ولكنى امسك بزمام اصابع يدى بصعوبة بالغه عن النيل من عرضه السايسى - هذا ان كان قد تبقى له منه شىء - ان سالومى تبكى دما فى قبرها الان فقد اصبح هناك من تعرى اكثر منها امام بنى اسرائيل .... عذرا سالومى ولكننا حضارة سبع تلاف سنه ، ولازم دايما نكون سباقين فى الحجات دى...... سيدى الرئيس........ سيدنا يحيى يستطيع الان ان يبتسم فى مراره ..... هناك رقاب كثيره قطعت عوضا عنه .
*** اترككم مع التصريح الثورى الملىء بالحكمه الجباره ........ انصتوا


اللهم....... "مـــمـــنــوع" ......آمييييييييين


النهارده اول جمعه منذ بدأت الاحداث الدموية فى غزه، بس يظهر انها غزه فى "بعد اخر او عالم موازى " غير اللى احنا عايشين فيه، طبعا نزلت عشان اصلى الجمعه - ودا شىء فى حد ذاته جميل - اللى مش جميل ولا حتى طبيعى - خاصة انى صليت فى مسجد البلد الرئيسى اللى بيصلى فيه حوالى 3000 شخص - ان الإمام طلع من عالم موازى او بعد اخر " لالالا...... دا غير البعد بتاع غزه ....ركزوا شويه معايا ".... استنى حضرة سعادته يتكلم عن اى حااااااجه ..... اى حاااااااااااجه ......تخص وضع اهالينا هناك من بعيد او قريب او حتى من وجهة نظر الCNN .............. مفيش ........... بح ........... سكوت .......... هوه للامانه اتكلم عن الموت واعداد العدة له واننا الى جنة او نار ..... انا بصراحه ساعتها حسيت انى ظلمته وانه بيسخن بس وهيتكلم اهه...... لحد ما فهمت ان فيه جنازه هتقوم من المسجد بعد الجمعه....... ساعتها راح عندى كل امل فى انه ينطق حتى حرفى الغين والزاء مجتمعين ......... بس اكيد طبعا هيدعى ليهم، او حتى بوجه عام ، لأخواننا المسلمين فى مشارق الارض ومغاربها .... الخ الخ ..... الدعاء الاعتيادى بتاعنا يعنى ....... اقسم بالله ما قال فى دعاءه قبل الاقامه سوى " اللهم انصر الاسلام واعز المسلمين" .......... وفقط .
*الهذا الحد اصبحت قبضة امن الدولة قوية على مساجدنا وبيوت الله؟!!!!!!!
**الهذا الحد بلغت المهانه اننا حتى اصبحنا غير قادرون على " الدعاء" ...... اى عبث تقوم به الدولة المصرية بشعبها ...... ارى مظاهرات تضامنيه فى كل الدول العربية التى نقول عنها " زهقنا نحارب لهم " تخرج بملايين بمساعدة انظمتها التى نقول عنها ايضا " نظم خانعه" لتقول لا للذى يحدث فى غزه ...... ونحن عندنا لو خرج مائتى شخص امام اى من نقابتى الحرية " المحامين والصحافة" تجد اضعاف اضعافهم من الامن المركزى يحيطون بهم وكانها محاولة لقلب نظام الحكم الذى يعبث بنا.
***والله بعد تفكير ...... لم أجد بدا من ترك الدعاء لاهل غزه ..... هناك ملايين كثيره فى العالم يدعون لهم ....... ارى ان يركز المصريون دعائهم وعملهم وجهدهم لهدم النظام الوثنى الذى يحكمنا بيد اقل ما يقال عنها انها " يد نجسه " لا تستحق ان توضع على قيودنا.
****ارى من يصح فيهم " وجاء من اقصى المدينه " قد كثروا هذه الايام ........ سيدى الرئيس هتحتاج كام معتقل زياده الفتره الجايه.... الناس بقت مش مستحمله رائحه الخيانه التى تفوح منك .
......... صاحب الفخامه والسعاده والسمو ........ اسال الله فى علياء سمائه ان يذلك انت واعوانك ومن مالئك على مرىء ومسمع من العالم كله ............ انتهى.