الأربعاء، أكتوبر 13، 2010

تعبيريه حتى النصر

untitled





استمرار لمسلسل الصور التعبيريه ...وحتى لا تشعر جريدة الاهرام عميدة الصحف القوميه بالوحده ووحشة عدم وجود الانيس، انضمت لها اليوم جريدة الشروق، وهى من الجرائد المستقله فى مصر
حيث خرجت علينا اليوم بتقرير عن مناورات اكتوبر 2010 ، لم يكتفى باللغه السقيمه التى صيغ بها التقرير ولكن زاد عليها بعدد من الصور المتعوب عليها بصديق الطلبه فوتوشوب افندى
هذه المره لم تكن يده مغلوله وزاد فى عدد الصور التعبيريه عن واحده كما كان الحال فى فضيحه جريدة الاهرام مع صورة الرئيس، سنقوم معا فى الفقرات التاليه بتعديد واظهار تلك الصور، انا فرح جدا ...مصر اصبحت دولة تعبيريه ..ومن بعد مؤسسة الرئاسة انضمت مؤسسة الجيش الى المدرسه التعبيريه بجلالة قدرها




اول الصور "المعبره" كانت رقم 2 فى الصور المرفقه بالتقرير، وتظهر طائرات مروحيه ومصفحه وعدد من الجنود ولكن فى الزاويه اليمنى العلويه من الصوره يوجد انفجاران ولكن المدقق يجد انهم انفجار واحد وتم تكبيره -او تصغيره- وتكراره الى جواره بشكل ساذج لم يراعى حتى امكانيات الفوتشوب الجباره والقادره على جعل المشهد اكثر اقناعا ومقاربه للواقع



2




ثانى الصور التعبيريه -رقم 3 فى الصور المرفقه- كانت من الابداع بمكان حقيقة، فأن تغير تفصيله فى صورة واحده هو امر مقبول على المستوى التعبيرى الاول، لكن ان تدمج صورتين فى منظر واحد مع فبركة -عذرا- غلطه لسان، اقصد مع "بعبرة" تفصيله اخرى فى المشهد فلا تعليق لدى غير .. ياقلبك الجاحد يا صميده، الصورة تظهر على جانبها الايسر النصف الايسر من الصورة التعبيريه الاولى ولكن النص الايمن تم استبداله بنصف ايمن من صورة اخرى بها مروحيتان ولكن الحد الفاصل بين الصورتين لم يكن من التماهى بحيث يغطى على الفبركه المفعوله، ثم ان اللى هيفبرك بصورة يخبيها مش يكون عارضها قبلها بنص صوره، عذرا ان الكلام مكلكع شوية عن الصوره دى، بس دا علم ياجماعه علم ، انا لسه مخلصتش رايح فين؟؟ شايف بقا الركن العلوى يمين من الصوره؟ وعندك اتنين انفجار كوبى بيست جمب بعض وصلحه



3.1


3




ثالث الصور التعبيريه فشيخه الاداء عاليه جوده الامكانيات-رقم 7 فى الصور المرفقه بالتقرير- ، بجد الناس دى بتبهرنى، المنظر المره دى فى منتهى الجديه ومنتهى اللذه، دبابه على تبه رمليه، متكرره بنفس التبه على نسخه اكبر مع وضع دخان انفجارين بشكل واضح جدا انهم مقحمين على الصوره، ومننساش القاعده الذهبيه، نفس الانفجار هو هو مع تكبيره/تصغيره ووضعه الى جوار اخوه العزيز



7



ملاحظه اخيره : الصوره الاولى خالص فى التقرير انا شاكك انها تعبيريه بس تقريبا الاخ صميده كان مركز نص نص وهو بيعملها فمش قادر اجزم بهذا الاحتمال


السؤال اللى بيطرح نفسه او السؤالين بمعنى اصح اللى اتمنى تجاوبونى عليهم فى تعليقكم على التعبير المعبر المستعبر دا:
واحد- خلينا احنا شعب شاذج شاذج وهنغنى بكل فرحه طاغيه يا محلى رجعة ظباطنا من خط النار، منظرنا ايه قدام جيوش العالم الحر وجيشنا صور مناورته بتتفبرك عشان تبان اقوى او اكثر سخونه؟؟ يا كسوفى قدام الاخوه فى اسرائيل
اتنين - مين اللى فبرك؟؟ ها؟؟ ها؟؟ يعنى على بلاطه وربنا يستر ومروحش فى شربة كوارع بسبب التدوينه دى، اللى فبرك الصور دى المحرر بتاع الشروق ولا جياله متفبركه جاهزه من قيادة الجيش وما على الرسول الا البلاغ؟؟
الناس حذرتنى من طرح التساؤل ده ..بس انا لا اقصد سوى تحرى الحقيقه عشان محدش يقول بنتجنى على الصحافه .
كلمة لابد منها عشان ...احم ...التصوير وكده ...جيشنا مش محتاج الصور التعبيريه دى خالص وهو فى غنى عن اى تهويل او تهوين من شكل او حجم مناوراته .
اخر كلمه ..........................



هتوحشونى :$

هناك 23 تعليقًا:

  1. ده يطمننا على أي حرب جاية في المستقبل يا بابا، فوتوشوباية ح نضرب الحدود، فوتوشوباية ح ندخل القدس، فوتوشوباية ح نهد الكنيست فوق دماغ أهاليهم، فوتوشوباية ح نرجعهم بلادهم، فوتوشوباية نرجع اللاجئين، أهه خمس ست فوتوشوبايات حلوا لنا الصراع العربي الصهيوني..

    ردحذف
  2. هههههه فعلا شر البلية ما يضحك . يا نهار ابيض دا احنا معندناش جيش خالص . و لا يمكن هم قصدهم يعملوا كدا علشان اسرائيل ما تعتبروش تهديد و تقوم الدنيا و ما تقعدش على دماغهم

    ردحذف
  3. هههههههههههههههههههههههههه
    طب وربنا تعليقك يا فيصل باشا بالبوست كله
    تكرملى يا كبير :)

    ردحذف
  4. دي بقت موضة يظهر

    ردحذف
  5. @ياسمين
    التفسيرات دى مرحلة تانيه
    الاولى نعرف مين ورا الفبركه
    لو الشروق عاااااااااااااادى
    ما احنا فى زمن التعبيرى
    لكن لو .......... يبقى نو كومنت ...اهلى عايزنى :S

    ردحذف
  6. يا جماعة حضطر أذيع اسرار عسكرية
    التقارير السرية بتقول أن الحروب المستقبلية كلها حتكون افتراضية علي الشبكة
    وعلشان كدة هندنا سلاح الحرب الإليكترونية
    وطبعا المعارك كلها حتكون تعبيرية

    ردحذف
  7. @غير معرف
    ههههههههههههههههههه
    على كده انا ابدأ ادرب على اخر لعبه نزلت من كول اوف ديوتى -نداء الواجب- واهو تجنيد من منازلهم :P

    ردحذف
  8. ((:
    فالتحيا التعبيريه فى عصر انعدام الجاذبيه
    وسلملى على الكوسه
    ......
    جامد يا احمد

    ردحذف
  9. جامد جداً جداً جداً جداً يادكتور
    تسلم أيدك
    بوست ممتع للغايه

    ردحذف
  10. افضلوا احبطوا في صميده بقا ... ده مظبطكم اهو بالصور ..

    ماتعرفش فاتح دكانه فين... عايزه اعمل كا صوره تعبيريه ليا وانا بابني هرو ميرع التاسع في البلكونه

    تحياتي

    ردحذف
  11. استغفروا الله...الجندى المصرى خير اجناد الارض ...ربنا يعفى عنا وعنكم

    الا الصور دى ناقصه عنصر مهم جدا من عناصر الاثاره والتشويق الفونانه ناديه الجنتشى وهيا بتتقلب على تله ..مافيش كريتفيتى اخص

    ردحذف
  12. تفتكروا يكون الجيش هو اللي بعتهم للشروق؟

    ردحذف
  13. شكرا لردودكم ياجماعه
    وبجد التعليقات اجمد من البوست اللى خفيت فيه نغمة السخريه لاسباب عارفنها كلنا
    يخرب بيت خفة الدم المصري بجد ياشباب :)

    ردحذف
  14. قال في هذا السياق الشاعر عنترة
    في فن البعبرة و ساعات الفوتوشوب و نتائج مكعبرة
    لا تستغبر من اي شنخره فنحن عب معبر
    يحب البعبره

    معليش اصلي ما بعرفش فوتو شوب علشان اقدر ابعبر عن الي في نفسي

    تحليلك رائع

    ردحذف
  15. يا قلبك القاسي يا صميدة.... ده انت هاتتقطعي يا سوسو .. تحفة البوست يا برماوي ..بس عارف ناقصه ايه تجيب تلات كتاكيت من شركة الكتاتيك و يتصورا جنب الدبابة على اساس ان دول الأسرى .
    التعبيرية لو وصلت للناس دي يبقى فعلا ايامنا الجاية كلها اسود من شعر صدر تامر حسني.

    ردحذف
  16. شومب بنفسها بتعلق عندى؟؟؟
    انا فى منشكح ولا كأنى التنين الازرق فى زمانه
    صباحك فوشيا :D

    ردحذف
  17. فعلا عمار يامصر

    يتهيألى ان دلوقتى محررى الجرائد متوقعين ان اللى نظرهم ضعيف بس هما اللى بيقروا الجرايد

    أو ان اى حد مالوش فيها هو بدره اللى بيقرا الجرايد

    ردحذف
  18. جدع يابنى
    ولا تخاف من أى حاجة ، ولا حد يقدر يقرب منك

    جرايد المخابرات بتفضح نفسها

    ردحذف
  19. جيش على الورق بس وغضنفر على الشعب الله يكسفك يا حسنى

    ردحذف
  20. يا اخوانا انا اشتغلت قبل كده في كذا جرنان لازم تعرفوا ان اى حاجة خاصة بالجيش لازم الجيش هو اللى يبعتها غير كده انسوا انها تتنشر ممكن يقفلوا الجرنان فيها

    ردحذف
  21. عظيمة يا مصر يا أرض التعبيرية.
    كمل يا نيمو ;)

    ردحذف
  22. عفوا يا عبقرينو بس الصور التعبيرية دي صناعة الجيش وليس الشروق!!

    ردحذف
  23. برهومه
    مقدرش اجزم بكده من نفسى ياريس
    وانا طرحت تساؤل فى الاخر عن النقطه دى
    شكرا على الاطراء بالمناسبه :-\

    ردحذف