يخرب بيت عقلى ....طلعت لسه بحنلها

النهارده...الساعه واحده بليل ،قاعد بذاكر المأفونة "مادة البان ومراقبة اغذية" ،قلت اشغل اى حاجه تنسمع على ما اظبط الورق ،وبصراحه انا مخنوق من الكومبيوتر بس بما انى مركب عليه كرت دش قلت لما اشغل الاذاعه شويه كده ،خصوصا انى نادرا ما بسمع اذاعه "الجيل كله مش كده؟"، شوية على اذاعة الاغانى بس لقيتها مش مظبطه، قلبت على اذاعه الكبار،سمعت "مدد يارسول الله " لمحمد منير وبعدين ايتين قرآن...خلصوا راحوا داخلين بالنشيد الوطنى...مش عارف ايه اللى حصل بالظبط ...بس لقيت دمعتين بيتكونوا على حياء فى مقلتين عيناى ، فى بادىء الامر حسيت بالسخافه، ايه اللى انا بعمله ده، صعبانه عليا؟!"ميصعبش عليك غالى يا جدع" مش كل ده بتقسى قلبك عليها عشان اول ما تخلص تغور منها وجاى دلوقت تقولى صعابنه عليا ، فعلا دى مش شفقة، معقول لسه ليها معزه عندى، معقول لسه فيا اقول بحبها،بصراحه اكتر،معقول انا لسه ساذج كده فى زمن شعاره الاساسى "اهبش واجرى ...طول ما النيل بيجرى" ، يمكن بس الحمد لله النشيد مطولش...مطولش عليكم