المشاركات
دا المعرض بتاعنا ببساطه - تصوير مصطفى زكى
عميد الامن الجامعى بيمارس حقه الغبائى فى افساد المعرض ... بعد الصور دى وطى وجاب اللوحه وقطعها والنديم حاول يمنعه ... بس الغباء ملوش حل - تصوير مصطفى زكى
لشاب اللى بيزعق قصاد رشا بدوى دا للاسف امين اتحاد شباب الجامعه .. شغال مرمطون للامن ...للاسف- تصوير مصطفى زكى
دا عميد الامن اللى كان قافنا وحاول يطقع لوح المعرض ويطردنا من المكان وجابلنا مسئول رعاية الشباب فى الجامعه عشان كده - تصوير مصطفى زكى
اللى حصل فى المنصوره تقريبا يوم مصغر من اللى حصل فى القاهره باستثناء ان ربنا ستر ومفيش اعتقالات .
بدأ بتأخرنا نص ساعه عن الميعاد المتفق عليه وهو اتناشر الضهر ودا ببساطه لان الامن كان واقف لنا هناك قدام كافيتريات كلية الحقوق
اللى زاد وغطى ان ادارة الجامعه متمثلة فى رعاية الطلاب حاولت تعمل ضربة استباقيه للمعرض البسيييييييط خالص اللى كانت ناويه عليه حركة ستة ابريل واقامت حاجه شبة اليوم الرياضى كده ايام المدارس … بنج بونج وشد حبل …اه والله شد حبل … ومسابقات غناء ومعرض رسوم
دا كان فى كذا مكان فى الجامعه … والاجمل انهم عاملينه فى مداخل الطرق الاساسيه فى الجامعه عشان لو فى اى تحرك لسته ابريل او الاخوان يتم اجهاضه او تفرقته .
قلنا مش مشكله …. اهم حاجه الامن ميقرفناش … خدنا الفرشه..اقصد الكام لوحة بالصور اللى معاهم ورحنا على المكان المتفق عليه … حطينا المعرض على الارض ..زى ما باين فى الصوره … وبدأت رشا بدوى تتكلم … وتبين ايه سبب المعرض وليه عايزين الدستور يتغير واشمعنا طلبت معانا نقول لا لقانون الطوراىء …. الناس بدأت تستجيب وفيه ردود حلوة وتبعث على الامل بدأت تطلع … ماشى .
بعد شوية بدأت البشاير تهل بقا … اتنين أمناء شرطه وظابط عسولة ومعاهم اللاسلكى اللذيذ ووقفوا يتفرجوا وبراءة الذئاب فى عنيهم … عادى … اى نعم صورتهم وخدت كام كلوز اب عشان الكروت وكده ..بس كانوا هاديين .
حبه وبدأت المناوشات … امين اتحاد طلاب الجامعه … المعين طبعا لان مفيش انتخابات … كان واقف يسمع واحنا مش واخدين بالنا … بدأ الشد والجذب فى الكلام عشان نوصل لدرجة انه يقف على المعرض برجليه ويقولنا يلا امشوا من هنا …. زعيق قصاد زعيق ..عشان نفاجىء ان واحد من الامن فى لبس مدنى كالعاده كان واقف … اتقالى انه عميد بس انا مش متأكد… المهم بدأ يدوس على المعرض ووطى مسك احد اللوحات وقطعها … البعض مننا تصدى ليه … بوكس بدأ يحوم فى المكان …. عربية جابت المسئول الجامعى عن رعاية الطلاب … وبيطالبنا بتصريح للمعرض دا … طبعا معبرناش .
فوجئنا ان العالم الهايفه راحوا جابوا طرابيزة بنج بونج وحطوها جمبنا … عشان آل إيه.. الناس تتشد لهم ويمشوا من عندنا … اسلوب اطفال وشغل سذج بصراحه …. ولا حد عبرهم … مناوشات من هنا وهناك كل شوية والوضع كان رايح فى سواد.
مراسلين الصحف اللى كانوا معانا اتزعقلهم عشان بيصور البهوات ... طبعا انا اتهددت انى لو مبطلتش تصوير هياخدوا الهاندى كام منى .
شوية ولقينا مجموعه شكلها غريب كده من الرجال جت …اللى قديم فى الحركة اتعرف عليهم انهم مخبرين امن دولة … اتهزءوا من رشا كالعاده J وخدوا كلمتين فى جنابهم ... ولا حياة لمن تنادى.
اضطرينا اننا ننهى المعرض بعد ما وصل لرشا بدوى انها هى والبنات هيتشدوا اول ما يخرجوا من الجامعه .
كالعاده نظام مبيتشطرش الا على البنات .
بدأنا فى الخروج تلاتات او اقل عشان نشتتهم .
بعضنا طلع بسلام
والبعض الاخر اتحاصر فى الجامعه لبعض الوقت وبعد كده عرف يخرج
الجميل اننا جمعنا حوالى تلاتين توقيع على بيان البرادعى من شباب الجامعه …. عدد كويس جدا نظرا للهرجله اللى كانت حاصله .
بس
دا اللى حصل باختصار لانى مرهق ومش مركز وناسى جزء من الاحداث
سلام.
ليست هناك تعليقات:
إرسال تعليق