افطار البرادعى لسنة اولى تغيير وسحور 6 ابريل

 

دى تدوينة انطباعات اكتر منها احداث

                 *محطة النزول: السيدة زينب...

-لافتات تأييد فتحى سرور مرشحا "بالتزكيه" فى كل مكان .
-بنرات التأييد الفج لمبارك وابنه من منافقين شعبنا الكريم قابلتنى بس بعدد اقل ،صورت واحده منهم وتبادلت انا وصاحبها ابتسامات صفراء، وبصراحه انا صورت ومشيت علطول احسن اضرب ولا حاجه.
-ربنا مخلاش فى نفسى حاجه وشوفت ملصقات التأييد لجمال مبارك رأى العين منوره السيده زينب، بس مصورتهاش لان مستوى القرف كان زاد عندى اوى.



        **محطة الوصول: افطار البرادعى بمطعم ابو رامى...




- غمز ولمز بينى وبين الشباب عن اسم المكان، لان على الرغم من مواجهته للمستشفى البديع 57357 للاطفال الا ان ايحاءات الاسم "الشعبيه" كادت ان تحبط البعض فى مدى لطافة المكان، بس طلع على المستوى المرجو لما دخلناه :).



- لجنة نظام والدخول بالاسماء وبيديك كارت دعوه شخصى باسمك ، بتاعى ضاع للاسف، بصراحه كنت هبروزه ،مش لانه افطار مع البرادعى ودعاة وشباب التغيير وبس ، لكن لانه احتفالا بمرور عام على بداية الدعوه للتغيير فى مصر.






- اجمل شىء فى الافطار كان مقابلة شباب التغيير اللى معظمهم معرفوش الا اون لاين على الفيسبوك ، كان شعور جميل جدا انك تقابل ناس شاركتهم فى صنع حدث زى دا لاول مره وجها لوجه.



لاحظ حجم النوت اللى بتكلم منها :P
- المنظمين خصصوا وقت -كان قصير جدا- لتلات محافظات يتكلموا عن تجربتهم مع التوقيعات والفعاليات اللى اتعملت عندهم وبايديهم ، اسكندريه ومحافظه كمان -مش فاكرها- ومحافظة الدقهليه، للاسف ممثل الاسكندرية كان محضر ثلاث ورقات من القطع الكبير والقاهم كاملين، واللى بعده ورقتين ، ومتبقاش لى كممثل عن محافظة الدقهليه غير 45 ثانية بس الحمد لله قدرت اوصل اهم تلات حجات عندنا:
1- أول استقبال جماهيرى حقيقى وملموس فى الشارع للبرادعى كان عندنا فى المنصوره.
2- اعتمادنا على اللامركزيه فى العمل فى الدقهليه جعلنا فى وقت من الاوقات انشط المحافظات فى الشغل على التغيير وكان لينا فى كل مركز او اتنين مجموعه عمل شغاله بشكل لا مركزى،فيه بعض القصور فى الاداء بنحاول نعدله فى الايام الجايه.
3- تذكير البرادعى والحاضرين ان اول نزول حقيقى فى الشارع فى مصر كلها كان لجزيره ابن سلام فى المنزله ، المختلف فى التجربه دى ان الناس اللى نزلنا نجمع منهم توقيعات بيتهموا دايما بعدم الوعى والبحث عن المصلحه الشخصيه وقريبه المدى زمنيا فقط -ولو كانوا كذلك لم اكن لأعيب عليهم نظرا لاوضاعهم المترديه- الا اننا وجدنا مستوى عالى من الوعى بهموم البلد ومدى احتياجنا للتغيير ، اوعوا تخرجوهم من حسابات التغيير.

         

            ***كلمة البرادعى :
أهم ما فيها ، الخلاصه لو نقدر نقول كده



1-فليخرج النظام خروجا امنا او اى خروجا يريده.
2-النظام سيتغير فى شهور او سنه كحد اقصى.
3-حصار اعلامى ومضايقات مستمره من النظام له.
4-التصريح النارى: فخور ان اجتماعنا مخالف لقانون الطوارىء.
5-مطالبته لكافة القوى السياسية بمقاطعه كاملة لانتخابات مجلس الشعب.
6- نزول الشارع والعصيان المدنى اذا لم يستجب النظام لدعاوى التغيير سيكون مرة واحده وسيكون النزول الاول والاخير.
7- الدعوة لاستمرار جمع التوقيعات وتوعيه المواطنين بحتمية التغيير واهدافه.






                     ****سحور 6 ابريل :







- مسيرة واغانى وطنية ولمة جميلة من الشباب أمام مسجد الحسين.
-الامن كان تعامله راقى جدا على غير العاده: مخبرين وعساكر فى ملابس مدنية كردنونا بهدوء وشياكه ومنعوا الناس من الاختلاط بينا او التجمع حوالينا.
- سحور شعبى بسيط من الفول والطعميه وبعده حبسنا بالشاى والساقع على قهوة فى اخر الشارع اللى على شمال الحسين.


                     *****ممدوح حمزه :





احمد ماهر فاجئنا ان الاستشارى الدكتور ممدوح حمزه ، المهندس الغنى عن التعريف جاى يقعد معانا شويه، كان حوارنا معاه ممتع ومثمر جدا ويكفى ان الرجل افتنع بعد نقاش مع الشباب ان طريق التغيير فى مصر عن طريق اللاعنف هو الاصح بعيد عن الثوره الحمراء والفوضى الخلاقه.

سيت عرض شرائح لصور اليوم على فليكر

          * نقطه اخيره مش مرتبطه باى حاجه من اللى فاتوا:
البرادعى كرم كتير من اللى حضروا الافطار
بس فيه من اللى مقدروش يحضروا يستحقوا مننا كلنا كل احترام وتقدير وتكريم
بخص منهم هنا كل شباب الحمله فى الدقهليه
واكتر حد بجد منهم لازم نشكره هن بنات ونساء التغيير
دكتوره نهى ... اختنا الكبيره
منى وميس ورشا ... من اجدع وانشط الناس اللى قابلتهم بجد فى حملة التغيير
وبقول ليكم انتم الاربعه بجد بجد لولا ظروف السفر اللى لم تتناسب معاكم كنتم تبقوا احق مننا بالحضور والتكريم
شكرا ليكم جدا :)

                                                              بس خلاص
                                                              روحت بلدى
                                           ووصلت لسريرى الحبيب على 7 صباحا.
                                  كل سنة وانتم طيبين
                                                           وعيد سعيد عليكم 
                                                                    :)

-------> دا تفريغ لتويتاتى اثناء اليوم دا من اوله لاخره من حسابى على تويتر:

طبعا مارست رقابة ذاتيه على بعض التويتات اللى كتبتها فى لحظات كنت مستفز فيها او مش فاهم ...تحياتى :P

سلامو عليكم ------ وصلنا الافطار والحياه زى الفل ---- بس موبايلى مش لاقط شبكه ومش عارف ارفع الصور --- بس الروح حلوة جدا :)
أول صوره من افطار البرادعى http://twitpic.com/2lv0xn
صوره.شباب ٦ ابريل ف افطار البرادعي#‏‎#egypt ‎ http://twitpic.com/2lv3kh
صوره.. وصول البرادعي ;) http://twitpic.com/2lv56i
قدامي طرابيزة المراسلين الاجانب ؟ يالعبك يابرادعي
هفطر بقا :)
انا اللي هقول كلمة الدقهليه.. صباح التوتر
البرادعي اثناء الامسيه http://twitpic.com/2lvsf2
البرادعي اثناء القاء كلمته ف الاحتفاليه http://twitpic.com/2lvx00
يخرب بيت الهرجله.. كلمتي اتهرست ف ٤٥ ثانيه :-(
اوبا..البرادعي بيقول فليخرج النظام خروجا امنا او اي خروجا يريده ‏:-P
حكاوي عن التفرقه العنصريه ف جنوب افريقيا :-|
البرادعي: النظام سيتغير ف شهور او سنه كحد اقصي
البرادعي: حصار اعلامي ومضايقات مستمره لنا
الناس بتهتف وتصفق للبرادعي حين قال: فخور ان اجتماعنا مخالف لقانون الطوارئ ;)
فاصل من الحكاوي ;-)
انتهت كلمه البرادعي
هيكرموا المتطوعين
اتكرم احمد ماهر وتامر ع الوهاب و رانيابدران وطه ع التواب وهشام الهواري
ومحمد الطيب وساره كمال ومها الجمل ومروه علام ومحمد الشناوي واحمد حسن وسعد بحار
واسامه البورسعيدي وع الفتاح والزفتاوي ومحمد شلبي ومؤمن دهب وايمان كساب وجو البرت
ونائل حسن وابو العز و محمود عادل الحته
واخرون.. والامسيه خلصت :)
بروباجندا فاكس.. عمال المطعم هيوقعوا ع بيان التغيير :-/
رايح سحور ٦ ابريل.. يوم جامدز ‏;-D
‏ ‏‎@Bad_Way ‎‏ جمب بدوي ع رصيف الحسين :)
شباب 6 ابريل بيغنوا قدام الحسين اغاني وطنيه
صوره. ازاجيل شباب 6 ابريل ف الحسين http://twitpic.com/2lxp4p
الامن مرشق وبيمشي الناس و٣ عربات امن مركزي ومطافي
انا جاي اتسحر مش اضرب ولا اعتقل ياجزم ‏:-P
ههه امن ف لبس مدني مطوقنا بشياكه من غير تحرشات.بس مانع اقتراب المواطنين
وقفونا ف صف واحد عشان نطلع م الكردون ‏:-P
اخيرا بنتسحر ‏;-D
اليوم دا هفتكره كتير من جماله والروح الحلوه اللي فيه :->
صوره.. سحور 6 ابريل :) http://twitpic.com/2lybrt
الدكتور ممدوح حمزه الاستشاري الهندسي معانا ‏:-D
صوره.. الدكتور ممدوح حمزه ف سحور 6 ابريل ‏ http://twitpic.com/2lyxvb
الدكتور ممدوح حمزه بيشيش .. صباح المزاااج ‏ http://twitpic.com/2lyzcb
القعده جامده جدا مع د.ممدوح حمزه والراجل ابن نكته ‏:-D
هههه .. واحد من الامن بيشارك ف الحوار وممدوح حمزه بيهيس قصاده ‏:-P
ممدوح حمزه: شباب التغيير أمل مصر الاخير لكن ينقصهم الالتحام مع العمال والفلاحين
ردا علي مفيش فلاحين ف مصر لسه..ممدوح حمزه: امال امي اللي بتزرعهم ‏:-P
نقاش جاد جدا عن مشاكل مصر مع د.ممدوح حمزه
الشباب الجامدين اقنعوا ممدوح باللاعنف بعد ما كان عايزهاثوره حمراء ;)
بطاريه الموبايل خلصت..كان يوم جامد .. تصبحوا علي خير :)