الوقفه التضامنيه امام كنيسه مارجرجس بالمنصوره ضد جريمة الارهاب بالاسكندريه

تنويه: لسريعى الملل---- سيبك من التدوينه كلها وادخل على اول مقطع:اختصار

الــتــجــهــيــز:

امبارح بليل بعض شباب التغيير فى المنصوره قرروا يعملوا اى حاجه تظهر تضامنهم وتعاطفهم مع اخوة الوطن والدم .. اخواننا الاقباط، دورنا على اكبر كنيسه فى المنصوره لقيناها مارجرجس اللى فى شارع بورسعيد، الايفينت اتعمل على الفيس بوك الساعه 11 بليل، اللى اكدوا حضور لحد الصبح كانوا حوالى 150، حضر منهم 60-70، عدد بعتبره كويس جدا بالنسبه للسرعه وضيق الوقت اللى كنا فيه

الــتــمـــهــيـــد:

رحت لوحدى الصبح حوالى الساعه 10:30 على امل انى اقابل حد من الكنيسه وانسق معاه او اعرفه بحضورنا ، كنت عامل حسابى -زى ما نصحنى صديق مسيحى - انى اطلب من بواب الكنيسه يندهلى حد من المسؤلين جوه ، منعا للبس او سوء التفاهم، وصلت للمكان وانا شايل شنطتى اللى بحط فيها اللاب ومتعلاقاتى، الشنطه تقريبا فى حجم شنط الابتوبات او اكبر سنه وكان باين انها تقيله على دراعى، لقيت افراد امن امام الباب بس لقيته مفتوح -كانوا حوالى خمسه - لقيت نفسى بدخل من الباب لوحدى وموقفتش للسؤال، دخلت على جوه علطول ومفيش اى حد وقفنى ولا طلب منى تحقيق شخصيه لحد ما وصلت لفرنده واسعه لمحت فيها قسيس قاعد مع اخت مسيحيه، سلمت عليه ورد السلام ، ابلغته باسفى وعزائى ليه فى شهداء الاسكندريه وتضامنى معاهم كمصرى مسلم واعلمته ان فيه وقفه تضامنيه معاهم كمان شويه قدام الكنيسه، شكرنى بس نبهنى انه مش المسئول عن قرار زى ده وانى اكلم ابونا راعى الكنيسه فى مكتبه، ندهلى على احد الفراشين يوصلنى ليه، دخلت على الرجل واعدت نفس اللى حصل مع القس اللى كان فى الخارج، شكرنى وقالى طب اندهلى نقيب امن الدولة احمد الزهيرى من بره، طلعت على البوابه وسألت احد افراد الامن عليه رد بغباء _هات بطاقتك_ رديت عليه بغباء اكبر ، بقولك "ابونا" عايز النثيب احمد جوه ، وصلنى ليه والضابط اخدنى ودخلنا مع اتنين مخبرين للقس، شرحله اللى انا قلته وانهى كلامه ب" فبشوف رأيكم ايه فى انهم يتضامنوا معانا؟" ، الضابط كان ناقص يرمى عليا شرر من عنيه بسبب الغيظ.

تـــحـــقـــيـــق مــصــغــر:

اخدنى بره، مع عتاب بسيط انى مرحتلوش من الاول وكان هيسبنى اعمل اللى عايزه، طلعنا بره لقيت رتبه اكبر منه-بان من اسلوب تعامله معاه- واقف منتظرنا، اخدوا بطاقتى لتفريغ بياناتها ، فتشوا الشنطه بالكامل-بعد ايه ما لو كنت ارهابى كانت خلصت يا مهملين- ، فتح النت بوك بتاعى وقلب فى الداتا اللى عليه والصور، وفى الاخر قالى استنى على الرصيف المقابل للكنيسه لما تتجمعوا وبعدين روحوا هناك.

الــوقــفـــه:

الاعداد كانت ضعيفه فى الاول الا انها على 11:30 كان العدد بقى معقول جدا، رفعنا لافتات التضامن ، هتفنا وقولنا اننا اخوات ، فوجئت بوجود المنتقبه والملتحى والعجوز كمتضامنين مع اخواتهم، قس الكنيسه خرج لينا وسلم على المتضامنين وشكرهم على المشاعر دى ، والكبار عرضوا عليه فكره اننا نشاركهم الوجود فى الكنيسه اثناء صلاة العيد يوم الخميس، الرجل شكرهم واعتذر بان الجزء اللى هيتم تنفيذه من العيد هو الصلاة الخاصه بالمسحيين فقط فى ظل الغاء الاحتفالات.

الوقفه النصابه:

بعد انتهاء الوقفه رحنا مشوار انا واحسان سلطان زميلى فى حركة 6 ابريل وفى رجوعنا حوالى الساعه 2-3 الظهر لقينا "مينى وقفه" تضامنيه منظمها الحزب الوطنى ، بس مش قدام كنيسه ، قدام مقر الحزب ، البشوات وقفوا اتصورا بالبدل والبانرات حوالى 3 دقايق ، او اقل، وفى لمح البصر مجرد ما انتهى مندوبو الجرائد من التصوير ، رمى كل واحد البانر اللى فى ايده وخد بعضه ومشى ، اللى ركب عربيه واللى دخل المقر ، وسابو السعاه يلموها ، التفاصيل باينه جدا فى الفيديو المرفق من تصوير احسان سلطان

بـــــــــــــاخـــــــــــــــتـــــــــــــــــصـــــــــــــار:

1- الكنائس المصريه لم تؤمن كما يدعى النظام، والدليل دخولى بدون اى توقيف حتى داخل المبنى التعبدى دون ان اواجه باى استفسار عن بطاقتى ، والاسوء من ذلك انى كنت احمل شنطه ذراع لا يستبعد ان تكون محمله بالمتفجرات، كل ذلك فى وجود ضباط امن دولة على مدخل الكنيسه وليس حتى ظباط نظاميين فقط

2- التضامن كان حقيقيا ومن القلب وقد اثر فى جدا تواجد الافراد الاتيين:

* سيده عجوز مسلمه

** ام مصريه محجبه عاديه جدا

*** سيده منتقبه وللمفاجأة فقد كانت فى بعض الاوقات هى التى تهتف والجمع يردد ورائها

**** النائب السابق للاخوان المسلمين عن دائره منيه النصر ابراهيم ابو عوف والذى تم التزوير ضده لصالح مرشح الوطنى بفجاجه غير مسبوقه شهدتها بام عينى اثناء مراقبتى للانتخابات منذ شهر

***** طفله صغيره فى عمر الزهور كان صوتها يطغى فى بعض اللحظات على غيرها من الكبار اثناء الهتافات

-----------> كل تلك النماذج التى تقول انه لازال هناك امل فى ذلك البلد المنكوب موثقه سواء بالصور او الفيديو كما ترون.

3- امن الدولة لم يكن ليتعاون معى لولا الاشاره الخفيه التى استشعرتها فى كلام القس باستحسانه للفكره

4- الحزب الوطنى اهبل... بس خلاص

الـــــــــــــــــــــــــــــــــــــصــــــــــــــــــــــــــــــــــــــــور

قيادات المعارضه بالدقهليه تعزى القسيس

المنتقبه اثناء الهتاف ونحن نردد خلفها - يوجد فيديو ايضا بالاسفل

نائب الاخوان المسلمين بمجلس الشعب السابق عن دائرة منية النصر من ضمن المتضامنين

رفيقه دربى - شنطتى اللى دخلت بيها دون اى توقيف لحد القساوسه جوه الكنيسه

وقفة الحزب الوطنى بعدنا بساعتين امام مقر الحزب بالمنصوره

هنا بعد لحظات من القائهم البنر لان التصوير خلص والسعاه بيلموه

الــــــــــفـــــــــــيــــــــــــد يـــــــــــو