حداد على خالد سعيد

استجابة لدعوة نشطاء الفيس بوك هنــــــــــــــــــــــــا ..... اذا كنت مدونا ..ارجوا منك الانضمام

خالد سعيد ..حادث تعذيب جديد فى الاسكندريه

تحديث 2 : من مدونة محمد عبد الفتاح :

حد المتظاهرين امام قسم شرطة سيدي جابر يروي العنف الذي تعرضوا له علي يد قوة أمنية. 


كان عشرات النشطاء السياسين و اهالي منطقة كيلوبترا قد شاركوا في وقفة سلمية أمام قسم شرطة سيدي جابر احتجاجاً علي مقتل خالد سعيد الشاب السكندري علي يد مخبري كيلوبترا

تحديث: من نوت على الفيس بوك 

خالد محمد السعيد 
أسكندرانى
28 سنة
والده متوفى من و هو عنده 5 سنين
والدته ربة منزل كبيرة فى السن
عنده أخت كبيرة متجوزة و عايشة فى القاهرة 
أسمها زهراء
و أخ أكبر ب15 سنة أسمه أحمد و عايش فى أمريكا و معه الجنسية الامريكية
ساكن فى كليوباترا
مخلص ثانوية عامة 
و مدخلش جامعة
بس كان مهتم بالمزيكا و الاجهزة و الكمبيوتر

يوم الحادث الساعة 10 مساء كان واقف مع صحابه فى الشارع و كان واحد "مِعرفه" بيجري و بيجري وراه تلاته مُخبرين
بسبب حياذة و تعاطي مخدرات لهذا الشاب
استنجد بخالد فجري عليه راحو المخبرين جريوا وراهم هم الاتنين و مسكوا خالد و الولد التانى هرب
مسك المخبرين خالد أمام باب بيتهو كتفوه و اعدوا يضربه افتراضاً بأنه هو كمان معاه "بودرة" من غير تفتيش ولا حاجة
و خبطوا راسه فى السلم لحد ما مات
بعديها أخدوه فى البوكس ودوه القسم الظابط لاقه ميت
قاللهم أرموه قدام بيته و حطوله كيس بودرة فى فمه و قولوا أنتحر
و سرقوا 100 جنية كانت معاه و تليفونه المحمول
و الولد التانى "عُرف" انه مات من جرعة مخدرات مكثفة ليلة الحادث

كان الساعة 11 و اكتر من 150 شاهد أتصلوا بالاسعاف و راح المشرحة
رفض أخوه أخذ العزى غير لما يجبلوا حقه

أهل خالد و صحابه عملوا أعتصام .. دلوقتى 12 مساء الخميس 10\6 أمام قسم سيدى جابر
بوجود صحافة و مصورين

و أصدر مأمور القسم بتصريح من الداخليه أمر بضرب و أعتقال كل المعتصمين 
و ملمومين كلهم دلوقتى فى قسم سيدي جابر
و من ضمنهم صحافيه شابة و مصور شاب و محامي أتضربوا و كسروا الكاميرات و حبسينهم

أسماء المخبرين 
- عوض
- محمود الفلاح

و ضابط المباحث اللى كان فى البوكس
مباحث قسم سيدى جابر
-أحمد عثمان

أهل خالد مش ساكتين و مش هيسكتوا على حقه و هيوصلوا القصه لكل المسئولين و وسائل الأعلام

بقالى مده كبيره معملتش اى تدوينات ... جيت امبارح وكتبت واحده مفروض انها مسليه ودمها خفيف لكن للاسف مينفعش انزلها فى الجو المحبط اللى صحيت عليه النهارده الصبح

بصراحه انا شفت الصور امبارح بليل قبل الفجر بشوية ومكنتش مركز..افتكرتها صور للشباب المصرى اللى اتسحل واتصلب فى لبنان ..بس عن قرب ...ساذج انا

اقوم الصبح الاقى اسماء محفوظ فاتحه بوست اقتراحات على الوول بتاعها فى الفيس بوك عن مواجهة التعذيب اللى حصل لخالد محمد

مركزتش اوى

الاقى عبد الرحمن فارس عامل بوست على مدونته ...حاولت اتأكد من مصدر صحفى ملقتش ...بس وصلت ان اساس الخبر الدكتور ايمن نور

خلاصه الامر عشان مطولش عليكم ان الشاب خالد محمد كان قاعد فى نت كافيه دخل اتنين مخبرين "ياكلوا عيش " على قفا رواد المقهى ..للاسف خالد كانت روحه حرة شوية ..رفض طريقة التفتيش المهينه اللى اتعاملوا بيها معاه

طبعا دا ينرفز البشوات اللى خلاص اعتبروا الشعب دا شوية خنازير فى خرابه هما بيديروها ...وزى ما انتو عارفين ..كل ما تضرب الخنزير ياكل ويتخن اكتر .... البشوات طحنوا العلقه التمام قدام رواد النت كافيه واصحابه ...وخد عندك الكلمة الوسخه الجايه دى ...وسط ذهووووووول المتواجدين...ذهول ايه يا شعب حقه يتمسى ويتصبح بعلقه ..يعنى انا متأكد ان اللى كانوا فى السايبر كافيين اوى يدافعوا عن الفقيد ربنا يرحمه ويصبر اهله ....لييييييييييييه محدش هز طول ودافع عن الواد ... انا شايف انه نجاح للساسيه اللى بتنفذها الحكومة المصرية فى التعامل مع جيرانها ...واحنا مالنا ..هاتوا فلوس واحنا نحارب ..ما احنا ياما عملنا وخدنا ايه ...النتيجه ان الشعب نفسه بقى بيتعامل مع بعضه بنفس الطريقه ..وادى النتيجه ..جهاز امنى متوحش نسى اصلا ايه وظيفته الاساسيه ..وشعب خانع خاضع ذليل متواطء موطوء مخنوق قدام القوة دى .

الحفله لسه مخلصتش رايح فين؟؟ لسه لسه دا الكلام هيحلو....

بعدين اخدوا خالد لعماره جمب السايبر وكملوا الضرب وتقريبا حسوا انه لسه فيه الرمق وبالتالى شدوه على البوكس وووده قسم الشرطه ...عملوا الواجب والحمد لله وصلوه لبيته الحقيقى صح

واستريح من الدنيا وقرفها

وجابوه رموه فى الشارع مكان ما خدوه ..بس خلاص

النت كافيه : فى شارع  بوباست 

منطقة الحادث: كليوباترا

المجرمين تبع قسم شرطة : سيدى جابر

المخبرين هما : محمود الفلاح والاخر شهير ب عوض المخبر

اهل الفقيد : حرروا محضر رقم 1545 بتاريخ الاثنين سبعه يونيو 2010

التفاصيل بقى للى عايز يتأكد هتلاقيها

عند ايمن نور فى الفيس بوك

عند عبد الرحمن فارس فى مدونته

عن جريدة الشروق فى عدد النهارده

إسأل البرادعي: الإسلام و تغيير المادة الثانية؟‬

إسأل البرادعي: الإسلام و تغيير المادة الثانية؟‬

أول جولة ميدانية لناشطي حملة جمع التوقيعات للبرادعي

تحديث: النت اتعدل شوية ..بس التدوينه اللى انا كنت كاتبها طلعت تعبانه جدا قياسا للتقرير الرائع للصحفى احمد عطيه اللى كان مرافق لنا فى الرحلة الجميله لجزيرة ابن سلام فى بحيرة المنزله

هنزل التحقيق بتاع احمد وهزود عليه الصور من عندى ... والفيديو قريب ان شاء الله

تحقيق الجولة : لاحمد عطيه .....

تصوير: محمد حسن ......

تحديث مؤلم: تصوير الفقيد : محمد حسن

(الشروق) تسجل أول جولة ميدانية لناشطي حملة جمع التوقيعات للبرادعي

OR

http://bit.ly/9Hdmj7

الفيديو على الفيس بوك اهه http://bit.ly/cd2Dpc

اقروا التقرير على الموقع وتعالوا شوفوا الصور هنا :)

التفاصيل بعد ما الانترنت يتظبط عندى ... وملعون ابوكى يا تى اى داتا

يوم 6 ابريل فى جامعة المنصوره – يوم فحلقى

دا المعرض بتاعنا ببساطه - تصوير مصطفى زكى

عميد الامن الجامعى بيمارس حقه الغبائى فى افساد المعرض ... بعد الصور دى وطى وجاب اللوحه وقطعها والنديم حاول يمنعه ... بس الغباء ملوش حل - تصوير مصطفى زكى

لشاب اللى بيزعق قصاد رشا بدوى دا للاسف امين اتحاد شباب الجامعه .. شغال مرمطون للامن ...للاسف- تصوير مصطفى زكى

دا عميد الامن اللى كان قافنا وحاول يطقع لوح المعرض ويطردنا من المكان وجابلنا مسئول رعاية الشباب فى الجامعه عشان كده - تصوير مصطفى زكى

اللى حصل فى المنصوره تقريبا يوم مصغر من اللى حصل فى القاهره باستثناء ان ربنا ستر ومفيش اعتقالات .

بدأ بتأخرنا نص ساعه عن الميعاد المتفق عليه وهو اتناشر الضهر ودا ببساطه لان الامن كان واقف لنا هناك قدام كافيتريات كلية الحقوق

اللى زاد وغطى ان ادارة الجامعه متمثلة فى رعاية الطلاب حاولت تعمل ضربة استباقيه للمعرض البسيييييييط خالص اللى كانت ناويه عليه حركة ستة ابريل واقامت حاجه شبة اليوم الرياضى كده ايام المدارس … بنج بونج وشد حبل …اه والله شد حبل … ومسابقات غناء ومعرض رسوم

دا كان فى كذا مكان فى الجامعه … والاجمل انهم عاملينه فى مداخل الطرق الاساسيه فى الجامعه عشان لو فى اى تحرك لسته ابريل او الاخوان يتم اجهاضه او تفرقته .

قلنا مش مشكله …. اهم حاجه الامن ميقرفناش … خدنا الفرشه..اقصد الكام لوحة بالصور اللى معاهم ورحنا على المكان المتفق عليه … حطينا المعرض على الارض ..زى ما باين فى الصوره … وبدأت رشا بدوى تتكلم … وتبين ايه سبب المعرض وليه عايزين الدستور يتغير واشمعنا طلبت معانا نقول لا لقانون الطوراىء …. الناس بدأت تستجيب وفيه ردود حلوة وتبعث على الامل بدأت تطلع … ماشى .

بعد شوية بدأت البشاير تهل بقا … اتنين أمناء شرطه وظابط عسولة ومعاهم اللاسلكى اللذيذ ووقفوا يتفرجوا وبراءة الذئاب فى عنيهم … عادى … اى نعم صورتهم وخدت كام كلوز اب عشان الكروت وكده ..بس كانوا هاديين .

حبه وبدأت المناوشات … امين اتحاد طلاب الجامعه … المعين طبعا لان مفيش انتخابات … كان واقف يسمع واحنا مش واخدين بالنا … بدأ الشد والجذب فى الكلام عشان نوصل لدرجة انه يقف على المعرض برجليه ويقولنا يلا امشوا من هنا …. زعيق قصاد زعيق ..عشان نفاجىء ان واحد من الامن فى لبس مدنى كالعاده كان واقف … اتقالى انه عميد بس انا مش متأكد… المهم بدأ يدوس على المعرض ووطى مسك احد اللوحات وقطعها … البعض مننا تصدى ليه … بوكس بدأ يحوم فى المكان …. عربية جابت المسئول الجامعى عن رعاية الطلاب … وبيطالبنا بتصريح للمعرض دا … طبعا معبرناش .

فوجئنا ان العالم الهايفه راحوا جابوا طرابيزة بنج بونج وحطوها جمبنا … عشان آل إيه.. الناس تتشد لهم ويمشوا من عندنا … اسلوب اطفال وشغل سذج بصراحه …. ولا حد عبرهم … مناوشات من هنا وهناك كل شوية والوضع كان رايح فى سواد.

مراسلين الصحف اللى كانوا معانا اتزعقلهم عشان بيصور البهوات ... طبعا انا اتهددت انى لو مبطلتش تصوير هياخدوا الهاندى كام منى .

شوية ولقينا مجموعه شكلها غريب كده من الرجال جت …اللى قديم فى الحركة اتعرف عليهم انهم مخبرين امن دولة … اتهزءوا من رشا كالعاده J وخدوا كلمتين فى جنابهم ... ولا حياة لمن تنادى.

اضطرينا اننا ننهى المعرض بعد ما وصل لرشا بدوى انها هى والبنات هيتشدوا اول ما يخرجوا من الجامعه .

كالعاده نظام مبيتشطرش الا على البنات .

بدأنا فى الخروج تلاتات او اقل عشان نشتتهم .

بعضنا طلع بسلام

والبعض الاخر اتحاصر فى الجامعه لبعض الوقت وبعد كده عرف يخرج

الجميل اننا جمعنا حوالى تلاتين توقيع على بيان البرادعى من شباب الجامعه …. عدد كويس جدا نظرا للهرجله اللى كانت حاصله .

بس

دا اللى حصل باختصار لانى مرهق ومش مركز وناسى جزء من الاحداث

سلام.