المشاركات
اضغط على الصور لحجم اكبر والوصف على موقع فليكر
بسم الله
نبدأ منين ؟؟؟
اها
خلونا نقسم اليوم لتلات مراحل بالنسبه ليا .
الاولى لما كنت مع خال محمد صلاح و محاميه والمحامى المنتدب من مركز النديم ومعاه الدكتوره سلوى هى كمان من مركز النديم.
التانيه لما كنا قدام مكتب وكيل النيابه.
التالته لما كنت فى المستشفى اللى فيه محمد صلاح فى المنصوره.
*اولا:-
اتقابلنا انا من جهة والاستاذ هيثم محامى مركز النديم والدكتور سلوى من المركز من جهة والاستاذ مصطفى محامى الشاب محمد صلاح ضحية التعذيب وخاله الاستاذ عادل من جهة اخرى .
بداية الكلام كانت للاستاذ مصطفى وهو اللى اتصل بمركز النديم وكان السبب الاساسى فى نشر القضيه للرأى العام وقال ان غرضه من دا حماية الضحيه واهله من تعنت الشرطة لان الناس عندنا غلابه ومتعرفش حقوقها والشرطه بتعتمد على تهديد الضحايا بمزيد من الضحايا اذا لم يتم التنازل والسكوت,يعنى يهددوا الاهل لو ملموش الدور عشان الابن اللى اتعذب هياخدوا الابن التانى وهكذا.
الاستاذ عادل خال الضحيه كانت متعاون معايا جدا وقال انه مش هيسكت خصوصا ان الولد "متدغدغ" جدا ، الخال اشتكالى ان محمد صلاح معمول عليه مراقبه اربعه وعشرين ساعه مستمره على شكل ورديات من ساعه ما دخل المستشفى بشكل بيمثل ارهاب ليه ولاهله لو حاولوا يتكلموا .
وهنا اتدخل المحامى وقال كلام استغربتله جدا: ثم التحقيق مع محمد صلاح فى حضور اربع لواءات شرطه ومن غير ما يكون محاميه موجود وكانت حالته الصحيه سيئه جدا انه يمثل لاى تحقيق وتم تعنيفه هو ووالدته (والد محمد صلاح متوفى ) ، الاغرب ان التحقيق تم فى وجود الاتنين عناصر الشرطه المتهمين بتعذيبه ، يعنى الجلاد كان هو الخصم والحكم ، اى شهاده دى اللى تتاخد واللى اجرم فى حقك واقف فوق رقبتك !!!؟.
لما سألنا المحامى ايه سبب تواجدنا فى النيابه دلوقت ، قال انه هيقدم طلب لمنع التحقيقات الغير قانونيه مع الضحية محمد صلاح لان مفيش اذن من النيابه للتحقيقات دى خصوصا ان اللى بيقوم بيها "مفتشين من وزارة الداخليه".
** ثانيا :-
بعد كده طلعنا الدور التالت فى مجمع المحاكم اللى فيه النيابه الفرعيه لدكرنس ودخل محامى محمد صلاح ومحامى مركز النديم وخال محمد صلاح لوكيل النيابه ووقفت انا والدكتوره سلوى ننتظرهم بالخارج ، الدكتوره كانت بتحاول انها توعى المخبرين اللى برا بطبيعة وحقيقة وظيفتهم وكان الرد محفوظ منهم " احنا عبد المأمور" وانا كنت بتوت اللى بيحصل باستمرار .
شوية وخرج لنا من مكتب وكيل النيابه-وكيل اخر غير اللى عنده المحاميان- عقيد شرطة عرف نفسه بـ علاء زكريا بعد وصلة هزار انه يشبه مرتضى منصور ، المهم سألنا عن صفاتنا وانا قلت انى صحفى عشان ميشتغلنيش ، قالى: ياريت تكتب الحقيقه بس ومتحاولش تدى للامور اكبر من حجمها ، والحقيقه هنا واضحه وهى اقوال "المتهم" فى محضر الشرطه انه فعلا مكنش معاه رخصه وحاول الهروب من الكمين ولما قبضوا عليه وعرف انه هياخد محضر قيادة توكتوك بدون رخصه رمى نفسه من الشباك .
هنا اتعصبت الدكتور سلوى وسألته ازاى مفتشين من الوزاره يحققوا معاه دا غير قانونى ، رد بان دا مش تحقيق عشان القياده بدون رخصه لكن تحقيق "ادارى" لانه اشتكى عاملين فى وزاره الداخليه وجزء من التحقيق معاهم اخذ اقواله ، قالتله ان دا غير قانونى وانتا عارف كده ولكنه تهرب من الاجابه ، بس فى الغالب كان محترم فى التعامل معانا ومكنش فيه اى نوع من "التحرش" الامنى بينا.
فى اثناء تواجدنا قدام مكتب وكيل النيابه حضر الى المكان مراسل جريدة الغد محمد صبرى وتعارفنا ولقيته بيحذرنى من واحد واقف جمبنا انى اخد بالى من كلامى قدامه لانه امن دولة ، شوية ولقينا مخبر جاى بيأمرنا بالتوجه لـ " مدير النيابه" ، الدكتوره معبرتوش ومشيت من النيابه راحت على المستشفى فى المنصوره فى لحظتها لكن احنا سمعنا الكلام ورحنا لقيناه سألنا عن وظيفتنا –شاب فى سنى تقريبا-، اخد كارنيه مراسل الغد وانا استغرب اوى لما قلتله انى مدون ومش تبع حد واخد بطاقتى وقالنا استنوا برا خمس دقايق ، شوية وندهلنا وقال تمشوا من هنا لان تواجدكم فى النيابه غير قانونى الا باذن من النائب العام !!!!!!!!!
بعدى طردى من النيابه اضطريت انى اسيب الجماعه فى غرفة وكيل النيابه وامشى اروح المستشفى .
***ثالثا:-
رحت المستشفى وعرفت ادخل مع انه ممنوع –ازاى!؟- معرفش انا خدتها عبط فى هبل كده لقيتنى وصلت ، كلمت ابن عم محمد صلاح واسمه هيثم وهو المرافق الوحيد اللى كان متواجد معاه فى المستشفى ، قالى انه مش هيقدر يتكلم دلوقت لان المستشفى كلها مخبرين وجمبه مخبرين ومحمد نايم اخد مسكن ولو حاولت ادخل هعمل مشاكل ليهم ، ساعتها انا كنت واقف قدام قسم العظام فى الدور التالت وبينى وبينه امتار ، بعد مداولات وكام اتصال اقتنع اخيرا انى مش جاى عشان ااذيه خصوصا لما عرف اسمى واطمن انى فعلا من بلد جمبهم وان شاء الله هحاول اتقابل فيه النهارده بليل .
*** ملاحظه اخيره : نبيل قال ان والدة محمد صلاح "فى مشوار" ومقلش انها فى مديرية الامن زى ما منشور فى الجرائد .
ربنا معاك يا دكتور و نعرف نحافظ على حقهم
ردحذفربنا يعينك نيمو مشكور على المجهود
ردحذف